💫: મહિલા સરપંચે પુષ્પગુચ્છ આપી દારૂનો અડ્ડો બંધ કરાવવા કહ્યુ ૧૦ દિવસમાં દારૂનો વેપાર બંધ કરવા સભ્યો સાથે રજૂઆત કરી

ખેડબ્રહ્મા તાલુકાના લક્ષ્મીપુરા ગામે મહિલા સરપંચ હેતલબેન પટેલે દારૂનો વેપાર બંધ કરાવવા માટે અનોખી પહેલ કરી છે. તેમણે ગ્રામ પંચાયતના ૧૦ સભ્યો સાથે મળીને ગામમાં દારૂનો વેપાર કરતા એક વ્યક્તિને પુષ્પગુચ્છ આપી રજૂઆત કરી હતી.આ ઘટના ૦૪/૧૦/૨૫ ના રોજ મોડી સાંજે બની હતી. સરપંચ હેતલબેન પટેલ અને સભ્યોએ લાલજીભાઈ ઠાકરડા નામના વ્યક્તિને દારૂનો વેપાર બંધ કરવા જણાવ્યું હતું. તેમને આગામી ૧૦ દિવસની અંદર લક્ષ્મીપુરા ગામમાં દારૂનું સદંતર વેચાણ બંધ કરવા માટે સ્પષ્ટ સૂચના આપવામાં આવી હતી.આ રજૂઆત દરમિયાન તેમને સમજાવવામાં આવ્યું હતું કે દારૂના કારણે ગામની બરબાદી થાય છે. ભૂતકાળમાં પણ દારૂના દુષણથી નાની ઉંમરના ઘણા યુવાનોના મૃત્યુ થયા હોવાનું જણાવવામાં આવ્યું હતું, જે ગામ માટે ખરેખર  ચિંતાનો વિષય છે.

Author: Najar News